உங்களைப் போலவே

உங்களைப் போலவே
சாத்தானின்
எல்லையற்ற ஆசீர்வாதங்களோடும்
கடவுளின்
தீராத சாபங்களோடும்
பிறந்துவிட்ட
என்னை மட்டும்
பெண் என்கிறீர்கள்

உங்கள் பிரியங்களை
மடியிலிட்டு
தடவி
தழுவி
பச்சையாகவே
புசிக்கத் துடிக்கும்
என் பசியை
திமிர் என்கிறீர்கள்

உங்களைச் சமைத்து
உங்கள் பசித்த வயிறுகளுக்கு
படையலிடும் என் போக்கை
ஆணவம் என்கிறீர்கள்

உங்கள் தோல்விகளை
ஏவாளின் ஒரேஆடையென
திரும்பத் திரும்ப
அணிந்து அணிந்து
உங்களைச் சாய்ப்பதை
காமம் என்கிறீர்கள்

என் அவிழ்தலில் பிறக்கிறது
உங்கள் தோல்வி

எங்கள் வெற்றி
பெண் சிசுக்களாய்.

ஒரு பூ

என் வீட்டு மல்லிகைச் செடியில்
ஏழெட்டுப் பூக்கள்

மனிதர்களைப் போலவே
தாவரங்களிலும்
தேடலுக்காய்
என்ணற்ற இலைகள்

எனினும்
ஒரு பூ ஒளிர வைக்கிறது
ஒரு தோட்டத்தை
ஒரு வீட்டை

நன்றி

விழி நகர்த்தி
இமைநுனி கோத்திருக்கும்
இரு முத்துகள்
எப்போதும் விழக்கூடும்
அணையப் போகும் விளக்கை
தூண்டும் விரல்களின் மீது

நெருப்பென ஒன்றாய்
நிலவென ஒன்றாய்

கனல்

                                                      ஒருமுறை வந்து
                                                     அணைத்துவிட்டுப் போ
                                                     பற்றி எரிய வேண்டும்
                                                     நான்.

அன்பிற்கான நேரம்

உன் அன்பிற்காக ஒதுக்கப்பட்ட நேரம்                          
காத்திருக்கிறது
புன்னகை ஏந்திய பூங்கொத்துகளுடன்

உன் வருகை
நிகழாதென உணர்ந்திருந்தும்
நிகழ்ந்துகொண்டே இருக்கிறது
உன் அன்பிற்காக ஒதுக்கப்பட்ட நேரம்                              

நம்பிக்கை வளர்த்த
பெருமர நிழலின்
பாதங்களில் அமர்ந்தபடியே
உலகை
வெவ்வேறு விதமாக
ஒப்பனை செய்து
விடைபெற்று மீளும்

பருவங்களை பார்த்தபடியே
காத்திருக்கிறது                                  

பூங்கொத்துகள் உதிர்ந்து வளர்த்த
பூங்காடுகளுக்கு நடுவே
பூங்கொத்துகளோடு

                       

மயிலிறகு பக்கங்கள்

என் புத்தகத்தில்
ரகசிய பக்கங்கள் என்று எதுவுமில்லை
பால்யத்தில்
ஒளித்து வைத்திருந்த ஒரே ஒரு மயிலிறகு

இப்போது குட்டிபோடத் தொடங்கிவிட்டது
மளமளவென்று
வாங்கி வாங்கி அடுக்க வேண்டும்
நிறைய நிறைய புத்தகங்கள்

பின்னொருநாள் நீங்க்ள் கேள்விப்படக்கூடும்
புத்தகங்கள் மயிலிறகுகள் ஆன கதைகளையும்
மயிலிறகுகள்
ஒரு ஆண்மயிலான கதைகளையும்
அந்த ஆண்மயிலுடன்
நான் வனமேகிய கதைகளையும்.

உருமாற்றம்

                                                                  நீ முத்தமிட்டபோது
                                                                   இதழ்கள் உதிர்ந்து
                                                                   அலகு தோன்றியது

                                                                   நீ தழுவிய போது
                                                                   கைகள் உதிர்ந்து
                                                                   சிறகுகள் முளைத்தன

                                                                    நம் இணைதலின் போது
                                                                    எடை இழந்து
                                                                    பறக்கத் தொடங்கினேன்


                                                                    இன்று வரை
                                                                    கிடைக்கவில்லை
                                                                    இழந்தவை

                                                                    நீ உட்பட