பவழமல்லி மரங்கள்

இனியொருமுறை
ஒரு பவழமல்லி மரத்தை
அவ்வளவு எளிதாக
நீங்கள் கடந்து சென்றுவிட முடியாது


இனி
எங்கேனும்
ஒரு பவழமல்லி மரத்தை
நீங்கள் காண நேரிட்டால்
நிறைவேறாதுபோன
உங்கள் உன்னதக் காதலொன்றை
அதன் செவிகளில் ஓதுங்கள்


அல்லது
தொலைவான் விண்மீனொத்த
பவழமல்லிப் பூவின்
வெண்ணிற இதழ்கள்போல அன்பில் சுடர்ந்து
அதன் செந்நிறக் காம்புகள் போல
துயரில் முடிந்துபோன
காதல் கதையொன்றைப் பாடல்களாக்கி
தன் சமூலம் முழுவதும் இசைத்துக் கொண்டிருப்பதை
செவிமடுத்துக் கேளுங்கள்


காற்றின் சுவடுகளொத்த
காதையொன்றால்
கனத்துக் கிடக்கிறது
இப்பவழமல்லி மரம்


வரலாறு தவறவிட்ட
அவர்களின் முதல் சந்திப்பு நிகழ்ந்தது
பசுங்குடை விரித்துக் காத்திருக்கும்
இதோ இப்பவழமல்லி மரத்தின் கீழ்தான்


ஆதிக்கனி புசித்த
ஆதாம் ஏவாளின்
முதல்நாள் மனநிலையை
அவர்கள்
அடைந்ததும்
கடந்ததும்
இதோ இப்பவழமல்லி மரத்தின் கீழ்தான்


பருவங்களைப் பற்றியபடி
படர்ந்துகொண்டிருந்த
அவர்கள் உறவின் மொழிகளில்
மெய்சிலிர்த்து
அவர்களின் மீது பூக்களைச் சொரிந்ததும்
இதோ இப்பவழமல்லி மரம்தான்

பின்பு
மரபு இட்ட எச்சங்களின் நச்சு நெடியில்
புலன்கள் திணறி
ஒரு மாரிக்காலத்தின்
இருண்மையை
ஈரத்தை
விழிகளிலிருந்து வேர்களுக்கு வார்த்துவிட்டு
அவர்கள்
உடல்களால் பிரிந்து சென்றதை
ஊமையாய் பார்த்து நின்றதும்
இதோ இப்பவழமல்லி மரம் தான்


இன்றும்
அவர்களின் ஈர மொழிகளை
தன் இலைகளிலும்
பூக்களிலும்
எழுதியெழுதி
உதிர்த்துக் கொண்டேயிருக்கின்றன
ஒவ்வொரு பவழமல்லி மரமும் 

இனியொருமுறை
ஒரு பவழமல்லி மரத்தை
அவ்வளவு எளிதாக
நீங்கள் கடந்து சென்றுவிட முடியாது.